Sa fàbula de sa cida

S'àrburi stravanau

"Atura atentu"

Custa fàbula d'eus trasmìtia martis 6 Abrili a is 3 e 30 de a meri' e domìnigu 11 a is 4 de a meri', naturaliamenti in

RadioPress 88,7 e 93,5 Mhz

Sa mùsiga d'at cumposta Alephra cun Mario Brai, Paolo Fresu, Silvano Lobina

In d-una isuledda bivianta seti sorris. No tenianta prus su babu e sa mama, e sa prus manna de issas castiat a is atras. Sa prus pitica fiat bella meda: is sorris fìanta fenjosas meda de issa, naranta ki no fiat bona a fai nudda e ki fiat una tonta.

Di narant a fai cosa traballosa, comenti a boddiri linna a padenti, betiri akua de sa funtana e castiai su fogu, ki depiat abarrai sempri allutu.

Ma issa, ki di naranta Nialong, faiat totu kena de si kesçai, ca teniat unu naturali bonu.

Una di', torrendi de padenti betendi unu muntoni de linna grai meda, si nci fiat frimada in s'oru de unu stanixeddu e si nci fiat acabussada in s'akua crara.

Unu piscixeddu asulu a scata de oru e de prata si nci fiat acostau a issa. Sa piçoca d'at pigau a bellu a bellu e nci d'at postu in su fraskitu suu.

Lòmpia a sa funtana, at lassau andai su piscixeddu e d'at castiau cun spantu nadendi in su lacu. Lòmpia a domu po prandi, at allogau a scussi unu pagu de arrosu, a pustis fiat torrada a sa funtana e d'at fuliau in akua.

Su piscixeddu fiat bènniu a pillu illuegus e at papau de gana bona, aici Nialong fiat torrada dònnia di' betendi su papai. Su piscixeddu amanniat e amanniat, imbecis issa, ki papat pagu e in prus traballat meda, fiat dònnia di' prus lanja e kena fortzas.

Is sorris fiant assumbrendisi'e una di' sa sorri prus manna at sighiu a sa piçoca finsas a sa funtana. Ingunis at biu ki ghetat in akua una manada de arrosu ki su piscixeddu asulu de oru e de prata, at papau illuegus.

Candu Nialong si nci fiat stesiada, sa sorri mala at açapau su piscixeddu e d'at bociu.

A pustis, torrada a domu, at nau totu prexada ki a meri' iat ai papau unu pisci mannu arrustiu, e ki Nialong, e gi fiat s'ora, no iat a essi fuia prus de domu a scussi.

Ma sa sorrixedda, ki iat cumprèndiu su ki fiat acadèssiu, si nci fiat disisperada aici meda ki si nci fiat arruta in d-unu sonnu ki pariat morta.

At bisau su piscixeddu, ki d'at nau a forrogai in su cinixu de sa forredda, a boddiri is spinas suas e a das interrai acant''e sa funtana.

A pustis de medas diis, cun assèliu mannu po is sorris, Nialong fiat arrennesça a si ndi scidai.

Si nci fiat pesada, at papau unu pagu de arrosu, a pustis, kena is atras da biiant, at forrogau in su cinixu e fiat arrennesça a boddiri is spinas de su piscixeddu suu stimau.

A is sorris at nau ki stiiat beni e ki podiat andai a pigai s'akua. Lòmpia a sa funtana duncas, at interrau in su pardu is ispinas de su piscixeddu, e pensendi a cantu fiat bellu, iat prantu afrigia. Tot'in d-unu, una cosa spantosa fiat acadèssia, difatis, una matixedda iat inghitzau a pillonai, e fiat amanniada de pressi.

Su truncu fiat de prata, is follas de seda asula e is froris de oru. In d-unus cantu 'e diis sa matixedda fiat bessia àrburi, ki Nialong akuat dònnia di' derremendi làgrimas.

Is sorris no si ndi fìant agatadas de nudda, ca issa betiat a domu de manera fitiana sa linna e is màrigas cun s'akua.

Ma cudd'àrburi fiat stravanau diaderus: su truncu de prata luxiat a de di' e a de noti,sulendi su bentu is follas de seda asula sonanta e is froris teniant unu fragu druci druci.

Una di' su bentu at betiu una folla e unu frori in s'ìsula acanta, a nca urrennat un'urrei jòbunu.

S'urrei si ndi fiat abarrau spantau meda e at cumandau a is tzeracus suus de agatai illuegus cudda mata ki dus faiat.

Sigumenti nemus d'at scìpia agatai, at detzìdiu de partiri issu e totu po da circai.

Fiat lòmpiu a s'ìsula acanta, e pagu atesu de sa praya at agatau sa domixedda de is seti sorris: at preguntau ki sciiant aundi s'agatat un'àrburi cun cuddas follas e cuddus froris, ma sa prus manna, kena duda peruna, d'at nau ki un'àrburi de cudda genia, ingunis, no d'iant biu mais. Is atras sorris puru fìanta cunfirmendi.

S'urrei, perou, sciiat ki in cudda domu bivìanta seti sorris: at preguntau insandus poita est ki fessint in sesi sceti a fueddai cun issu.

Sa prus manna at nau ki s'ùrtimu sorri fiat una tontixedda e ki no serbiat a nudda a d'intendi.

S'urrei jòbunu sighiat a da bolli biri po nci fueddai.

Candu Nialong fiat ananti sua, at fatu un'incruada garbosa e d'at nau ki d'iat ai acumpanjau a biri sa mata.

Arribaus a sa funtana e sa piçoca d'at amostau s'àrburi: issa at mòviu sa manu e totu is nais de s'àrburi ant fatu un'incruada, po ki Nialong podessit pigai is froris e is follas e das podessit donai a s'urrei.

S'urrei, totu prexau, at nau ki una piçoca ki arrennesciat a fai incruai un'àrburi de cudda genia, meresciat, kena duda peruna, de tenni a conca sa corona urreali.

Issu da boliat coyai, e issa prexada d'at nau ca eya, perou, s'urrei iat ai dèpiu permiti a prantai una nai de sàrburi in su jardinu de domu sua.

Anti fatu diaici, e in unu tretu de tempus pitikeddu, un'atru àrburi de prata, a folla de seda asula e a frori de oru fiat amanniau in cudd'ìsula a nca urrennat s'urrei e mulleri sua bella.

Asut''e s'umbra de cuddu àrburi stravanau, anti jogau a primu is fillus e a pustis is nebodis insoru.

Finsas is sesi sorris, arrepentias de essi stètias malas, anti bìviu totu sa bida castiendi s'àrburi nasçu acant''e sa funtana, ki testimonjat sa bonesa de Nialong.

Imparaus de sa fàbula