Arrosaspina

Una borta s'agatant un'urrei e un'arreina, ki disijanta tropu a tenni unu pipiu. Perou su pipiu no arribat mai. Una di', in su mentras ki s'arreina fiat sçacuendisi' in sa bartza, de s'akua ndi fiat bessia un'arrana, ki d'iat nau ki intr''e un'annu iat a ai nasçu una pipia.

Sa cosa fiat acadèssia diaderus, e fiat nasça una feminedda tanti bella ki s'urrei, totu prexau, iat cumandau a fai una grandu festa. Iat bòfiu cumbidai no a s'ereu e a is amigus sceti, ma is janas puru, de manera ki portèssinti sorti bona a sa dedda. Perou is janas in s'urrennu suu fìanta trexi, e s'urrei teniat doxi pratus 'i oru sceti: e insaras a una no d'iat cumbidada.

Sa festa fut tropu bella: su casteddu fiat totu illuxiai, is mesas totu prenas de cos''e papai tropubona. A primu de si ndi andai, is janas fiant acostadas a una a una a su bartzolu a nca fiat dromendi sa dedda, po di oferri is arregalus spantosus insoru: sa primu d'iat arregalau sa birtudi, sa segundu d'iat arregalau sa bellesa, sa de tresi s'arrikesa e aici nendi, ki a s'acabu a sa pipia d'iant assigurau totu su ki unu podit disijai in su mundu.

Sa de ùndixi janas iat donau sa norabona sua, ki totu in d-una ndi fiat lòmpia sa de trexi ki, po si vengai ca no d'ìanta cumbidada, iat nau a boxi arta:

- Sa prìncipa a cuìndixi annus s'at a pungi cun d-unu fusu e s'at a morri.

Totus nci fiant abarraus assicaus, ma sa jana de doxi, ki no iat fueddau ancoras, iat curreju su frastimu narendi:

- Sa prìncipa no s'at a morri, ma d'at a pigai unu sonnu mannu ki at a dromiri cent'annus.

Po amparai a sa deddedda sua s'urrei iat cumandau a abruxai totu is fusus de s'urrennu, e in s'interis in sa principedda si bìanta totu is arregalus de is janas: sa pipia fiat crescendi bella, bona, donosa e scida, e totus di bolìanta beni.

Aici fiat lòmpia sa di' ki fiat cuìndixi annus: sa mama e su babu fìanta partius e issa, ki fiat abarrada a sola in su casteddu, d'iat girau de donnya parti, lompendi a s'acabu a una tutti beça. Iat obertu s''enna e iat biu a una tzia beça filendi: fiat acostada de prus po biri mellus, iat pigau su fusu e si fiat punta unu didu. Illuegus a sa piçokedda di fiat pigau unu sonnu, ki iat pigau a totu is casteddayus puru.

Cumenti fìanta furriaus si nci fìanta dromius s'urrei e s'arreina, is serbidoras e su coxineri, is cuaddus in sa stadda, is canis in pratza. Si ndi fiat studau su fogu in sa giminera puru, ndi fiat calau su bentu e no si fiat mòviu prus nudda. A ingìriu 'e su casteddu fiat cresça una cresuri 'e spina ki donnya annu si fiat sempri prus arta e sempri prus prena, ki no fiat a biri prus nudda.

In s'urrennu ìanta cumentzau a nai su contu de Arrosaspina dromia, e donnya tanti calancunu prìncipi circat de intrai in su casteddu, ma no arrennesciat a sobrai su barramentu 'e spina.

Passaus ki nci fìanta cent'annus fiat arribau un'atru prìncipi ki fiat acostau a sa cresuri ken''e timi: no iat agatau spina, ma froris sceti, mannus e bellus, ki si ndi trocìanta po du fai passai. Su piçocu fiat intrau in su casteddu ki fìanta dromendi totus, iat passau totu is aposentus e fiat arribau a sa turri aundi fiat Arrosaspina. Si fiat incrubau e d'iat donau unu bàsidu: sa piçoca iat obertu is ogus prexada, e totus si ndi fìanta scidaus impari a issa.

Illuegus ìanta fatu una grandu coya e su prìncipi e Arrosaspina ìanta bìviu biaus finsas a si morri.

Imparaus de sa fàbula