S’òmini ken’‘e bratzus

In d-una gruta in cùcuru a monti biviat unu messayu beçu ki nisçunus sciiat de ita bidda fiat e poita biviat inguni a solu, ponendi froris e legùmini. A is ki di preguntanta a ita di serbiant is froris arrespundiat:

- Su legùmini po su stògumu, is froris po is ogus.

Ki calancunu ndi di domandàt unu, naràt ki donnya frori fiat ke una prenda ki faiat su scusorju suu e no ndi donàt a nisçunus. Issu pensàt a un'arrikesa ki no si fiat bia mai, prendas e prendas ki, segundu issu, fìanta cuadas in fundus a sa gruta. Perou, po pigau cussu scusorju serbiat un'òmini ken'‘e bratzus, bonu a passai sa maxia ki dui fiat. Ma no nci creiat nisçunus e totus du piganta po macu.

Una di' fìanta passaus duus cassadoris e, biendi cuddus froris bellus, ìanta circau de ndi pigai una pariga ma si fìanta puntus malamenti. Sciendi de su scusorju, ìanta fatu finta de essi stracus e ìanta preguntau de si podi pasiai in sa gruta. Cumenti fiant abarraus a solus ìanta cumintzau a circai is prendas ma sa gruta fiat de arroca tostada meda e a manu no pòdianta scorrovonai. Fìanta torraus a pustis ‘e una pariga ‘e diis, acarotaus a picaperderis, a picu e a pàlia. A su messayu d'ìanta nau a ki ìanta traballau meda inguni a canta e ki si bolìanta pasiai. Cuddu iat fatu finta de no dus connosci e dus iat fatus intrai. Custa borta ìanta traballau meda e ìanta fatu unu fossu fundudu, ki perou pariat ki no nci fiat nudda. Ma a s'acabu, unu iat biu su scusorju a illargus. Si fìanta naus, de cumenti fìanta cansaus:

- Torraus crasi e sigheus a sgavai.

Ma cumenti fudint a cant'‘e sa bessida is picus e is pàlias ìanta cumentzau a bolai a solas e a dus scudi a sa skina a totu birra, cumenti ki calancunu ki no si biiat dus movessit. E si ndi fianta fuius tzerriendi:

- Depit essi s'òmini ken'‘e bratzus…

Candu du contànta, nisçunus nci boliat crei ma in su mentras, issus, si fìanta cumbintus ki un'òmini ken'‘e bratzus sceti podiat pigai su scusorju. Ìanta fatu a sorti e su ki fiat incapitau si fiat fatu su giru ‘e is solinjanus cirkendiddi unu po di segai is bratzus. Perou, una borta ki iat'essi pigau su scusorju, in prus de du pratziri, su ken'‘e bratzus iat'essi tentu unu serbidori totu sa vida po du bistiri e po du fai papai. Nisçunu dotori, perou, fiat di acòrdiu a di segai is bratzus e aici, a s'acabu, fiat dèpiu andai a nke una brusça.

Issa d'iat postu una pumada niedda e a fragu leju e segau is bratzus ndi d'iat: issu iat sunfriu tropu ma sa brusça iat arregortu is bratzus segaus e dus iat allogaus, narendi ki iant'essi serbius.

Is duus òminis fiant andaus a sa gruta ma su fossu no nci fiat prus e su logu fiat totu arroca tostada e su scusorju no si biat mancu de a illargus. Si fiant arrèndius ca dus ìanta cullyunaus, ma su ken'‘e bratzus imoi, fiat abarrau pòburu e si depiat circai unu serbidori puru.

In bidda totus du sciianta e disijànt a pigai su scusorju ma no faiat de nisçuna manera. Una di' perou fiat passada una fèmina pedendi sa limùsina po issa e po su deddu suu, ki castiendiddu beni, si ndi fiant acataus ki fiat ken'‘e bratzus. Ìanta pensau:

- La' kini podit pigai su scusorju bincendi sa maxia…

E totus si nci ghetànt a ajudai sa mama, de manera ki no torressit a partiri ma tòcat a ki su deddu lompessit a dexot'annus, ca su messayu iat nau ki serbiat un'òmini, e no unu pipiu. Aici fìanta bìvius beni e, a s'acabu, lòmpiu fiat a dexot'annus. Cun sa mama fiant abarraus di acòrdiu ki su scusorju d'iant'essi pratziu e, cumenti fiat partiu po sa gruta, totus fiant abarraus a abetai sa torrada. Ma s'òmini fiat torrau no cun su scusorju, ma a bratzus, totu prexau, ki a primu fiat tristu sempri. Totus d'ìanta preguntau a una boxi sceti:

- E su scusorju?

E issu d'iat torrau totu allirgu:

- E no du bieis? Duus bratzus bellus po traballai!

Is atrus, invecis de essi cuntentus, d'ìanta furriau is palas. Is ùnigus diferentis fiant is duus cassadoris de tantis annus a primu: imoi a essi abarraus cullyunaus no fiant issus sceti.

Imparaus de sa fàbula