Juanni Drollu

Atesu meda, in mesu a su sartu, in d-una sienda biviat unu meri cun is fillus. Duus fiant aici studiaus ki ‘olìanta coyai sa filla ‘e s'urrei, ki ‘oliat unu maridu scìpiu e àbili a fueddai. Su de tresi fillus, intamus, sciiat pagu cosa e totus di naranta Juanni Drollu. Is duus fradis scìpius ìanta studiau otu diis finsas a sa di' ‘e s'apuntamentu cun sa prìncipa: su prus mannu sciat a memòria totu su fueddàriu de latinu e is ùrtimus tres annus de su jorronali de su logu, mentras su segundu sciat totu s'arregulàriu de is grèmius, fiat bonu a cosiri e a bordai e ndi cumprendiat de polìtiga puru.

Su babu fiat cumbintu ki unu de is duus iat'essi arrennesçu e d'iat donau unu cuaddu a peròmini, unu nieddu ke craboni e s'atru arbu ke lati. A su tempus ‘e partiri, perou, su de tres fillus puru fiat bòfiu andai, mancai ki no fiat studiau. Su babu mancu d'iat donau unu cuaddu e duncas iat sètziu unu merru. Fìanta partius totu currendi e su merru arrennesciat a sighiri beni is cuaddus e totu.

Juanni Drollu si ‘oliat coyai, de prus ancoras cun sa filla ‘e s'urrei, ki fiat famada po sa bellesa sua. Is fradis mannus, po kistionai prus a lestru in s'atòbiu, finsas si fiant unjus is ladus ‘e sa buca a ollu ‘e olia. Issu inveças no ndi teniat abisonju, ca kistionat e kistionat, ken'‘e mancu pensai a su ki narat. Aici donat ocasioni a is atrus, ki caminant a innantis totu citius.

Totu in d-una Juanni Drollu iat fatu:

- Oh, oh, labai it'apu agatau, un'arregalu tropu bellu po sa prìncipa!

E de s'arruga iat arregortu totu prexau una carroga morta. Is fradis d'ìanta castiau mali ma no ìanta nau nudda, ca scianta ki de prìncipas e palàtzius no ndi podiat cumprendi nudda. Cumenti ìanta caminau un'atru tanti fiant imparis ancoras, ma su merru no arrennesciat prus tanti a abarrai a fatu ‘e is cuaddus. Juanni Drollu iat fatu:

- Oh, oh, labai it'apu agatau, unu spantu po sa prìncipa!

E de s'arruga iat arregortu una cratzola beça. Is fradis no sciant ita pensai ma mancu custa borta ìanta nau cosa e si fìanta postus a curri po du lassai agoa. Su merru no fiat arrennesçu a dus sighiri ma a unu tretu di fiat pigada s'alidantza e dus iat lòmpius.

E Juanni Drollu iat torrau a nai:

- Oh, oh, imoi labai s'arregalu prus bellu! E si fiat incrubau po arregolli de s'arruga una farrancada de ludu friscu ki si fiat prenu sa busçaca ‘e sa janketa.

Po is fradis fiat tropu, iant ‘onau una pariga ‘e corpus ‘e zironnya a is cuaddus e fiant arrennesçus a si ndi stesiai.

E arribaus fudint a casteddu, sa filera de is candidaus fiat longa longa, ca s'urrei iat fatu pregonai in totu s'urrennu, cirkendi sa calidadi de sposu po sa filla. A unu a unu is jòvunus intrant ma totus abarrant a intrus pagu tempus, ca cumenti arribant a innantis ‘e sa prìncipa no arrennesciant a nai prus nudda. E aici nci dus boganta.

A sa bon'ora fiat tocau a su primu fradi, su ki sciat totus su fueddàriu de latinu e is tres annus de su jorronali, ki perou, po su biaxu tropu longu e po s'abetu si ndi fiat scaresçu totu, fiat abarrau citiu e iat pigau una bisura leja. A pustis fiat tocau a s'atru fradi, ma s'emòviu iat frigau a issu puru, fiat abarrau mudu ke pisci e nci d'iant ‘ogau.

In su mentras fiat arribau Juanni Drollu setzendi su merru suu. Fiat a bistiris totu scorriaus, totu scrabionau e a fragu malu puru. D'ìanta fatu intrai su pròpiu, ca s'urrei iat bòfiu aici. A intrus, iat cumentzau a fragai cosa bona e sa prìncipa d'iat nau:

- Funt is coxineris coendi is caboniskeddus.

E issu d'iat torrau:

- Beni meda, insandus potzu fai coi sa carroga mia puru!

E d'iat intregada a unu serbidori. Sa prìncipa d'iat nau:

- Eya, ma innui da ponis? Deu no tengu ni pinjaras ni sartannyas.

Ma Juanni Drollu no iat dudau e nd'iat bogau sa cratzola narendi:

- Innoi at a coi beni meda.

Sa prìncipa fiat spassiendisi' e po cussu iat nau:

- Àndat beni meda, est unu pranju cumpriu ma amàncat sa bannya.

E Juanni Drollu:

- Da tengu deu!

E iat pigau sa farrancada de ludu friscu.

Sa prìncipa iat pensau:

- A sa bon'ora unu diferenti, cun issu ge no m'ap'arrosci.

E aici Juanni Drollu fiat bessiu urrei, a arreina, a corona e a scrannu. Cumenti nci fiant abarraus is duus fradis e s'urrei e totu no du scieus.

Imparaus de sa fàbula