Sa filla de s'arregateri

Una borta s'agatanta duus arregateris ki biviant unu a faci 'e s'atru. Dònnia menjanu s'arregateri prus beçu oberiat sa fentana e abetat a oberri sa fentana s'atru arregateri ca di praxiat a du brullai.

- Cessu ta lejas ki funt is fillas tuas! Mi parinti concas 'e scovas!

S'arregateri joboneddu, scedau, nci abarrat mali, prus ke totu ki is fillas suas no fìanta lejas!

E ki boleus essi crarus crarus, fiat una piçoca bella diaderus. Po-i custa arrexoni puru su babu no arrennesciat a s'asseliai e fiat annugendisi'. Sa piçoca si ndi fiat agatada e, a pustis ki iat scìpiu poita est ki su babu fiat aici annujau, d'iat cunsillau comenti iant ai pòtziu sçolli custa kistioni.

- O babu naraddi ki poneus in posta custa cosa: a menjaneddu partu imparis a su fillu mannu suu - iat nau sa jovinedda ken''e timoria - e bincit totu sa sienda de s'atru kini at a arrennesci a betiri a primu a innoi su scetru e sa corona de s'urrei de Frantza.

S'arregateri beçu, ki in prus de essi tirriosu fiat unu tontu puru, iat nau ca eya illuegus. Is duus fillus fìanta partius a obresci obresci, setzendi donniunu a su cuaddu suu. Ma s'ègua arba de sa piçoca fiat prus lesta e forti, e su cuaddu mannu mannu de su fillu de s'arregateri beçu no arrennesciat a da sorigai.
Fiant arribaus in Frantza e sa piçoca si fiat mudada de bistiri e si fiat posta bistiris de òmini e fiat andada a su palàtziu de s'urrei.

- O s'urrei, a mei mi nanta Leputzeddu e femu su trinçadori de s'urrei de Nàpuli. Tribulias a scaradas m'anti betiu innoi.

- E ki t'agatamu unu traballu a trinçadori in sa Domu Arreali de Frantza? - d'iat nau s'urrei.

- Cessu! Acabonu mannu! - iat arrespustu Leputzeddu.

E aici fianta abarraus. Ma a pustis de unu tretu, s'urrei iat inghitzau a dudai.

- Est tropu lanju e dilicau, pòrtat is manus arbas e pòrtat su cingeddu stinghiritzu - iat nau a sa mama - scit cantai e sonai ki parit una fèmina diaderus.

- Baxei a sighiri fera imparis - d'iat cunsillau s'arreina - ki spàrat cìrcuri bolit nai ki pènsat a arrustiri sceti i est una fèmina ; ki inveças spàrat cardanera bolit nai ki di praxit a cassai diaderus i est un'òmini.

S'urrei iat postu a menti a su cunsillu de sa mama : in su mentras ki fìanta cassendi s'ègua iat tocau su bratzu de sa piçoca ki iat cumprèdiu ki depiat sparai a sa cardanera. Ma is dudas de s'urrei no si fìanta sparèssias.

- Betiddu a s'ortu - iat nau sa mama cumbinta - ki pìgat su trusioni sceti bolit nai ki est passientziosa ke totu is fèminas, ki inveças ndi 'ògat totu sa mata bolit nai ki tenit sa fortza de is òminis.

In s'ortu, s'ègua iat tocau torra su bratzu de su trinçadori farsu, ki iat cumprèndiu e iat prenu unu scarteddu de làtia cun is arrèxinis puru.

Cunsillendi cunsillendi s'arreina, ki creiat ki ndi sciiat meda de is cosas de su mundu, is proas fìanta sighendi. In su jardinu Luputzeddu no iat bòfiu fragai is arrosas: funti totu spina - iat nau èrridu - o s'urrei pigheisi' gravellu e gesminu ki est mellus.

- O fillu miu, e ita bolis ki ti nera? Betiddu a si nç'acabussai a frùmini - iat susprexau s'arreina, ki no di praxiat sa cosa, ca timiat ki su fillu si iat ai pòtziu agatai in cartas lejas.

S'urrei, o ca fiat tontu o ca di praxiat s'idea, iat cumbidau a Leputzeddu a andai a s'oru de s'arriu.

- Cessu ta basca leja! - iat nau s'urrei brafanteri

- Spullinkeisi' a primu fustei, o s'urrei, ki deu acàpiu s'egua a sa mata. S'urrei si ndi fiat spullincau de pressi e arriendi arriendi si nci fiat acabussau. Illuegus s'ègua iat inghitzau a annirgai e a cracinai.

- Abetit, ki depu curri a s'ègua acrikiddada - iat tzerriau Leputzeddu, e si ndi fiat fuiu. A un'àlidu fiat arribau a su palàtziu arreali e iat atobiau a s'arreina.

- O s'arreina, s'urrei fillu bostu si nc'esti spullincau a su frùmini e unus cantu 'e guàrdias, ki no d'anti connotu, du bòlinti arrestai. M'at mandau a innoi a pigai su scetru e sa corona cosa sua aici d'ant a connosci.

S'arreina totu spramada iat donau illuegus su scetru e sa corona a Leputzeddu, ki dus iat pigaus e fiat artziada a cuaddu e si ndi fiat fuia de pressi. Iat passau su frùmini, iat passau su monti, iat passau su padenti e fiat arribada a domu, fendi binci a su babu.

Imparaus de sa fàbula