Su forru ‘e ferru

Una brusça beça iat frastimau mali a unu prìncipi: d'iat ‘etiu in d-unu padenti e d'iat incotiu in d-unu forru ‘e ferru, ki d'iat at'essi pòtziu alliberai una principissa sceti. Cuddu fiat abarrau impresonau annus i annus, ken'‘e ‘essiri mai, finsas a candu, una di', fiat arribada in su pardu una principissa jòvona, ki si fiat pèrdia. De su forru, cuddu iat aboxinau:

- Deu ti nau cumenti furriai, ki mi promitis ki torras a innoi a berrina, a lima e a serrixedda, po stampai su ferru finsas a d'oberri, ki a pustis m'as a coyai puru.

Cudda si pensat de depi coyai unu forru ‘e ferru e po cussu no ‘oliat, ma sigumenti ki de calancuna manera depiat furriai, insaras si d'iat impromìtiu. Luegus, de a palas ‘e una mata, nci fiat stupau unu matzamurreddu ki d'iat acumpanjada a domu.

Cumenti sa piçoca iat contau su fatu a su babu, issu si fiat disisperau po su benidori de sa filla, ki fiat s'ùniga puru. Insandus, po cullyunai su forru, iat mandau in su padenti a sa filla de su molidori, ki fiat jòvona e bella e totu. Issa totu sa di' e totu sa noti iat circau de stampai su ferru, ma no fiat arrennesça mancu a du scarrafiai e aici, a s'obrescidroxu, sa boxi a intrus ‘e su forru d'iat nau:

- Mi parit a ki siat obresçu jai, inguni in foras…

E issa d'iat torrau:

- Eya, difatis seu intendendi su molinu ‘e babu puru…

Di aici issu iat scrubertu sa trassa, nc'iat bogau a sa piçoca e iat bòfiu sa principissa bera. Ma s'urrei mancu a nd'intendi, e insandus iat mandau a sa filla ‘e su porcarju, prus bella puru. Custa piçoca noa totu sa di' e totu sa noti iat circau de stampai su ferru, ma ken'‘e arrennesci a fai nudda. Sa boxi a intrus ‘e su forru d'iat nau:

- Mi parit a ki siat obresçu jai, inguni in foras…

E issa d'iat torrau:

- Eya, difatis seu intendendi is itzèrrius ‘e babu cun is porcus…

Un'atra ‘orta nc'iat bogau sa piçoca, ki boliat sa principissa bera, de sinunca iat'essi fatu dannu mannu a totu s'urrennu. Totus fìanta prangendi e preghendidda, e insandus a sa principissa a marolla di fiat tocau a andai in su padenti a cumpriri sa promissa. Issa iat stampau su ferru luegus e de su forru ndi fiat ‘essiu unu prìncipi tropu bellu, ki issa si fiat colada luegus. Fiat cruta a casteddu po du nai a su babu, ma candu fiat torrada su piçocu no nci fiat prus. Issa iat girau unu muntoni ‘e diis, finsas a candu fiat arribada a una barraca ki nci biviant un'arrana grassa e tantis arraneddas birdis. Fìanta donosas, d'iant atonada e iat dromiu in d-unu letu de seda e de belludu. A primu de torrai a partiri d'iant ‘onau tres nuxis, ki d'iant'essi serbias in is barrancus. Sighendi a girai, totu cansada, a s'acabu fiat arribada a unu casteddu. Iat domandau a da pigai a tzeraca e a coxinera, ki ‘oliat fai calikisiat cosa ca tantis sciiat ki inguni iat'essi agatau a su piçocu.

Cumenti iat acabau sa primu di' ‘e traballu, si fiat posta in s'aposenteddu suu e fiat po si papai una nuxi. Ma de su croxu ndi fiat bessiu unu bistiri ‘e arreina tropu bellu. In su casteddu biviat sa sposa de su prìncipi ki, cumenti d'iat scìpiu, iat nau ki su bistiri fiat su suu e du boliat issa. S'atra principissa coxinera d'iat nau ca eya, perou da depiat lassai dromiri una noti in s'aposentu ‘e su prìncipi. Issa d'iat ‘onau su permissu, ma in su mentras, a-i scusi, iat ‘onau unu dromidori a su sposu, e sa coxinera no d'iat pòtziu scidai ni kistionai cun issu de nisçuna manera.

Su meri' sighendi fiat acadèssia sa pròpiu cosa: de su croxu de sa segundu nuxi ndi fiat bessiu unu bistiri prus bellu ancoras, ki d'iat ‘ofiu sa sposa e iat donau un'atru dromidori a su prìncipi. E su meri' de tresi fiat po sutzedi sa pròpiu scena: su bistiri fiat una cosa spantosa, totu prenu ‘e diamas. Ma su prìncipi no iat bufau nudda, sa coxinera a sa bon'ora fiat arrennesça a di nai kini fiat diaderus e si ndi fìanta fuius imparis.

Ìanta biaxau unu muntoni ‘e tempus, truessendi montis ‘e cristaddu e padentis ‘e spadas, naviendi in lagus astragaus e bauendi arrius currendi. A s'acabu fìanta lòmpius in sa barraca de is arraneddas, ki luegus si fiat furriada a casteddu e is arraneddas a principeddus totu allirgus. Ìanta fatu sa coya e su babu de issa, s'urrei beçu, ki fiat abarrau a solu e tristu, d'ìanta cumbidau a bivi in su casteddu nou.

Imparaus de sa fàbula