Hansel e Gretel

Innantis a unu padenti mannu, biviat una famillya de unu sega-linna, ki fiat pòb uru meda e no sciiat comenti agatai cos''e papai po sa pobidda e is fillus suus, Hansel e Gretel.

Una di' sa podidda, arrosça de su fàmini, d'iat nau ca, ki bolìanta sighiri a bivi, si ndi depìanta lixerai de is fillus. Sa mama boliat a dus betiri in su padenti e a dus abandonai ingunis. Ma su sega-linna, ki boliat beni meda a is pipius, no dus boliat abandonai, e perou, a s'acabu, a marolla, iat dèpiu ponni a menti a sa pobidda mala.

Is pipius, a scussi, iant intèndiu totu: Gretel si fiat posta a prangi a corroxinus e fiat disisperendisi', ma Hansel d'iat nau ki iat ai arresòrviu totu.

A de noti fiat bessiu a pratza e iat ingortu perdixeddas biancas biancas de terra, perdixeddas ki luxiant asut''e su lugori. A pustis fiat furriau a domu e si nci fiat dromiu acant''e sa sorrixeda.

S'incrasi a s'obrescidroxu, sa mama dus iat scidaus e dis iat nau ki depiant andai totus impari a padenti a boddiri linna. Dis iat donau un arroghededdu 'e pani, e a pustis is pipius iant inghitzau a caminai a fatu de sa mama e de su babu. Hansel, comenti iat pensau sa noti prima, iat fatu arrui is perdixeddas biancas a s'oru de sa pareda, aici iat ai pòtziu agatai torra s'arruga de domu sua.

Arribaus ki fiant in su logu prus scurigosu de su padenti, sa mama dis iat nau a si frimai e a allui su fogu, ca issa e su babu iant ai sighiu a caminai ancoras, ca boliant agatai linna bona.

Sa noti fiat arribada de diora, ma sa mama e su babu no si biiant. Gretel fiat timi timi, e iat inghitzau a prangi a corroxinus, scuredda, ma Hansel d'iat amentau ki iat fatu arrui is perdixeddas biancas a s'oru de sa pareda. Is pipius iant pòtziu furriai a domu ca is perdixeddas luxiant asut''e su lugori.

Biendiddus su babu si fiat post a prangi de su prexu mannu, e sa mama iat fatu crei de essi prexada, intamus fiat arrenegada meda.

Su tempus passat, e su fàmini iat tocau torra s'enna de sa domu de su sega-linna, difatis in domuno d'iat prus nudda 'e papai. Sendi is cosas aici, sa mama iat cumbintu torra a su pobiddu a abandonai is fillus in su padenti: Hansel, ki iat intèndiu totu, iat apariçau un'atra trassa po arrennesci a furriai a domu.

Custa borta iat spimpirinau a s'oru de sa pareda, s'arrogu 'e pani ki sa mama d'iat donau, ma candu, sparèssius babu e mama, iat circau is pimpirinas ki iat fatu arrui, no iat agatau nudda, ca is pilloneddus das iant papadas illuegus.

Is pipius, scureddus, fìanta disisperaus e iant inghitzau a caminai peri su padenti, ken''e arrennesci a agatai s'arruga de domu. Fianta morendisi' de su fàmini, ma su pani fiat acabau e in su padenti podiant agatai bagas sceti.

S'incrasi fiant arribaus a innantis de una domixedda fata de pistocus, cunfitaus e çuculati: cun su fàmini mannu ki tenìanta, iant inghitzau a da papai illuegus, e in su mentras ki fìanta papendi, iant intèndiu una boxitedda tzerriendiddus. Fiat sa boxi de sa becixedda ki biviat in sa domu e ki dus cumbidat a intrai.

Perou sa becixedda no fiat una yaya bona, comenti ìanta crètiu issus, ma fiat una brusça mala mala, ki di praxiat a açapai is pipius ki agatat acant''e domu sua, ca di praxiat a si dus papai.

Illuegus sa brusça iat postu a Hansel in d-una càbia, e iat nau a Gretel a coxinai cosa bona po su fradi: sa brusça boliat a s'amueddai Hansel, aici d'iat ai pòtziu papai a pustis. Dònnia di' sa brusça andat acant''e sa càbia ca boliat biri ki Hansel si fiat amueddau beni beni, ma issu, no di faiat aprapai su didu, ma un ossixeddu, aici sa brusça no du bociat mai. Sa pipia fiat sempri disperendisi'e no boliat a si morri su fradi.

Aici, candu sa brusça d'iat nau a fai su pani, Gretel d'iat preguntau a si du spricai. Agoa, candu sa brusça fiat acant''e su fogu, de supetoni d'iat donau unu corpu e nci d'iat fata arrui in su fogu.

A pustis iat alliberau a Hansel e si fìanta fuius a fora de domu imparis. Sa domu fiat bessia luxosa luxosa, fata de prellas e prendas: is pipius si ndi fiant prenus is busçacas e si ndi fiant torraus a domu.

Arribaus a domu a pustis de tempus meda, iant agatau su sega-linna fendiddi un'acatu mannu, ki fiat prexau ke pùlixi. Sa mama mala si fiat morta e issus ìanta bìviu cun su babu in paxi, ken''e prus sa timoria de su fàmini, ca ìanta betiu un'arrikesa manna.

Imparaus de sa fàbula