Su lepureddu de mari

Nanta ki una di' una principissa, a pitzus de sa turri de su casteddu suu, teniat unu saloni mannu cun doxi fentanas. De donniuna de cuddas fentanas faiat a biri totu s'urrennu: de sa primarja faiat a biri totu is bividoris, de sa de duas faiat a si gosai una bista prus bella puru e aici nendi fintzas a sa de doxi. De aundi nemus, ma nemus diaderus, faiat a si ndi fuiri de sa castiada.

A sa principissa di praxiat meda s'indipendèntzia sua e duncas no si boliat coyai. Po cussu a kini da boliat coyai, depiat passai una proa crueli meda: donniunu intru de is mascus depiat circai de no si fai cassai andendi a su casteddu, deghinou d'iant ai segau sa conca. E issa arrennesciat a dus cassai de sa fentana primarja jai e totu a ingìriu de su casteddu s'agatànt is concas segadas de is scedaus, ki fiant norantaseti.

Una di' tres fradis, totu e tres colaus meda de sa piçoca, ant preguntau de fai sa proa orrorosa. A su primarju d'at cassau illuegus, mancai fessit cuau in d-una forada prena de cracina, e aici puru su de duus, ki iat sçoberau a cuadroxu su fundagu de su casteddu. Duncas is concas segadas fiant norantanoi. Su de tres jòvunus, timendisi' de d'acabai de sa pròpiu manera, at pregau sa principissa de di permiti a faddiri tres bortas: faddendi s'ùrtimu borta no d'iat'essi importau nudda de morri. Sigumenti fiat bellu meda e donosu, sa principissa d'at nau ca eya.

Su jovuneddu nc'iat pensau meda, ma no at agatau idea peruna ki d'iat ai fatu binci. Intzandus, po discansu, est andau a cassai. At biu unu crobu e du boliat sparai, ma cuddu d'at pregau a no du bociri, narendiddi:

- Ki no mi bocis, t'apu a donai unu cumpensu.

Issu at abasçau sa scupeta e su crobu si nd'est fuiu. Ingunis acanta at agatau un'atra prea, unu pisci mannu ki fiat andau a pillu in d-unu stàini. Ma custa bèstia puru d'at pregau a no du piscai, narendi ki d'iat a ai donau unu cumpensu. A s'acabu, prus a innantis, su cassadori bonu at sarbau unu mraxani, e torra, sa bèstia d'at donau su fueddu ki d'iat ai torrau su prexeri.

Ma imoi a marolla depiat fai su jogu de morti cun sa principissa. Su jòvunu no sciiat ita fai e duncas est andau a nke su crobu, ki at pigau de su niu suu un'ou grussu, d'at arrogau e at fatu apatai su piçocu a intrus, serrendi beni beni su croxu. Sa principissa s'est afaciada de unu muntoni de fentanas ma a sa de undixi sceti at biu a su piçocu.

S'incrasi su piçocu at circau s'ajudu de su pisci, ki si d'est ingurtu, cuendiddu in sa brenti. Ma custa borta puru, mancai fadiendi e a sa de doxi fentanas sceti, sa piçoca at cumprèndiu su cullunu e at fatu bociri su pisci. A su piçocu d'iat nau:

- No ti fatzu nudda torra, ma la' ki a sa borta ki benit sa conca tua at a arrui. At'essi sa de centu.

Abarràt sceti de circai s'ajudu de su mraxani ki fiat famau po sa marfuseria sua. Mancai custu, sa cosa fiat traballosa po su mraxani e totu. A pustis, totu impensamentau, sartendi, at nau a su jòvunu a du sighiri. Imparis funt lòmpius a una funtana, si nci funt acabussaus e ndi funt bessius totus mudaus, su mraxani fiat unu mercaderi totu allikidiu e su piçocu fiat unu lepureddu de mari bellixeddu meda. Is duus funt andaus a su mercau e luegus una truma de genti s'est acostada po biri cudda bestixedda stravanada. Est lòmpia sa principissa puru, ki totu pigada de cussa bestixedda d'at bòfia comporai luegus, boghendi de busçaca dinai meda. Su mercaderi at pispisau in s'uriga de su lepureddu, innantis de du lassai andai:

- Ki sa principissa andat a is fentanas, tui bai a suta de is pretas suas .

Fiat arribau su mamentu de cassai a su piçocu, ma imoi mancu is poderis de sa de doxi fentanas abastànt a scoberri su cuadroxu. Sa principissa si nci fiat atzicada meda, e at incumentzau a donai punnigosus a s'imbirdi, arroghendiddu. A pustis si nc'est agatada ki teniat sa bestixedda in mesu a is pilus, d'at ghetada a terra e d'at nau a si nd'andai e a no si fai biri torra. Su leporeddu est andau a nke su mercaderi, funt andaus a sa funtana po torrai is ki fiant. Sa proa d'iat passada, e su jòvunu est torrau a su casteddu a nca sa principissa fiat abetendiddu. Si funt coyaus e su piçocu est bessiu urrei e meri de totu s'urrennu. A sa pobidda stimada no at scoviau mai sa trassa de su mraxani, e issa si creiat i pobiddu suu fiat àbili meda, e po cussu d'at arrespetau sempri.

Imparaus de sa fàbula