Su sordadeddu 'e stanju

Una borta s'agatanta bintixincu sordadeddus de stanju, ki fìanta fradis, ca dus ìanta fatus totus de una culera. Fìanta totus ogualis: strantaxus, a bistimenta bianca e blau, a bonetu, a facili, a bayonedda a suta 'e bratzu. Bogau unu, ki d'ianta fatu po ùrtimu e ki teniat una camba sceti, ca su stanju no fiat abastau.

Custus sordadeddus dus iant arregalaus po is annus a unu pipiu, ki a de di' dus teniat arringheraus in sa mesa, e a de noti dus incotiat in sa cascita insoru.
Su sordadeddu a una camba sceti si càstiat a innantis ken''e si movi, strantaxu, e biat totu is atrus joghitus ki prenìanta s'aposentu de su merixeddu suu.

Du-i fìanta orsus, trenixeddus, trumbitas de liàuna e bidillyas de imbidri colorau. Ma su ki di praxiat de prus fiat unu casteddu 'e paperi, ki teniat is gennas e is fentanas ki fiat a das oberri.

Una di' a su sordadeddu d'iant arrimau pròpiu a faci de su casteddu, e duncas podiat biri mellus a intru 'e is fentanas de s'afaciada: nci fiant aposentus prenus de mobìlia e de sprigus, sofaus e tendas de belludu. Castiendi mellus, perou abarrendi strantaxu e a bayonedda a suta 'e bratzu sempri, su sordadeddu 'e stanju fiat arrennesçu a apubai a una piçoca de paperi tropu bella: portat is pilus tiraus a pitzus, sa cara arriendi, unu bistiri de seda lèbiu abellau cun d-un'ogu blau, ki ajumai fiat mannu ke sa faci sua. Fiat firma cun d-una camba sceti issa puru, o a su mancu aici di fiat partu.

Ma sa piçoca, ki fiat una baddarina, fiat a ekilìbriu cun sa punta 'e unu pei, e teniat s'atra camba parada in s'àiri, ke is bratzus, ki dus teniat a arcu in pitz''e sa conca. Perou de custa cosa su sordadeddu de stanju no si ndi fiat acatau, e da creiat oguali a issu, e si ndi fiat colau tropu. Sa baddarina e totu iat cumintzau a billai su sordadeddu, e pariat colada issa puru.

Una di' a su sordadeddu d'iant arrimau a cant''e sa fentana oberta. Iat cumentzau a proi e totu de sungunas unu tzàkidu 'e bentu nce d'iat bolau a foras, ki fiat arrutu in sa 'ia e nde d'iat pigau s'akua currendi in sa coneta. Su pipu e sa tzeraca d'ianta crutu, ma po nudda, ca s'akua nci d'iat ghetau a intr''e un'arreça, e de inguni fiat acabau in d-una trapa scuria.

Su sordadeddu fiat timendi meda, perou, sempri firmu a bayonedda a suta 'e bratzu, circat de pigai alidantza a s'arregordu durci de s'amorada sua. Una merdona d'iat cassau e iat cumintzau a du curri, ma issu sighiat a curri in s'akua prus lestru, finsas a candu no iat biu sa luxi prus.

Po un'arratu su sordadeddu iat pensau de si essi sarbau, ma s'abrexu suu si fiat stentau pagu, ca nci fiat acabau a mari, ki s'akua fiat prus forti ancoras e su pisci di anadat a canta e, forsis po curpa 'e su stanju ki luxiat, nci fiat acabau in su stògumu 'e unu pisci.

Ma in su mentras ki fiat pensendi po s'ùrtimu borta a sa colada sua, di fiat passada a canta sa lama acutza de unu gorteddu: fiat intrada luxi e su sordadeddu, totu sçocau, si fiat agatau in sa coxina 'e su meri suu, ki sa coxinera, ki iat comporau su pisci a su mercau, fiat fendi su pranju.

- Castiai, castiai, est issu, est issu!

Iat tzerriau sa coxinera boghendindi su sordadeddu de is intrannyas, mentras ki nd'aproilanta su pipiu, sa mama e su babu, ki no du podianta crei.

- D'eus agatau, d'eus agatau! -

Su sordadeddu iat torrau a pigai su logu suu in s'aposenteddu 'e su pipiu, a faci de su casteddu ki sa baddarina sighiat a nci baddai a intrus cun sa punta 'e su pei. No di pariat berus: totu sa di' pèdriu in is ogus 'e s'amorada sua. Issa e totu du castiat a ogus durcis, perou no ìanta muciu unu fueddu mai.

Una di', de sungunas, ken''e arrexoni, su pipiu iat pigau a su sordadeddu e, mancai pensendi ki unu aici, a una camba sceti, di arruinat sa bisura de is atrus, nce d'iat ghetau a sa giminera.

Su sordadeddu iat biu una grandu pampa e iat intèndiu tropu basca, ma no cumprendiat ancoras ki fiat sa pampa de su fogu beru o sa pampa de sa stima sua po sa baddarina.

Ma is coloris de sa bistimenta fìanta scallendisi', sa bayonedda fiat crokendisi', su bonetu no s'agatat prus. Iat circau de abarrai strantaxu de manera corriatza, mancai ki a una camba sceti, e po s'ùrtimu borta iat cassau sa mirada pèdria de sa baddarina sua. Ma inguni e totu una tzacada 'e bentu iat scampaniau s''enna e nd'iat pinnigau sa bambuledda 'e paperi, ki ndi fiat bolada a intr''e sa giminera issa e totu, ke una jana, a canta 'e su sordadeddu. Nci fut un'atra pampada e a pustis prus nudda.

S'incrasi sa tzeraca iat agatau in mesu a su cinixu unu corixeddu de stanju e un'acoreddu 'e paperi, perou totu abruskiaus e nieddus ke craboni. De su sordadeddu 'e stanju e de sa baddarinedda sua ndi fiat abarrau custu sceti.

Imparaus de sa fàbula