Su suliteri màgigu

Nanta ki una borta s'agatat una biddixedda in mes''e su padenti. Is ki bivianta ingunis fianta stètius sempri prexaus, ma de pagu tempus in sa bidda du-i fiat burdellu mannu ca fiat prena de sòrixis.

E no fiant unus cantu de sorixeddus de domu sceti: a tallus ndi bessìanta de dònnia stampu, de is arrugas, in is coxinas de domu, apitz''e is guarnissonis e apitz''e is teuladas puru. Is biddayus fìanta disisperaus e ìanta detzìdiu de andai a nai cosa a su sìndigu: "o su sìndigu, la ki sa bidda est prena de sòrixi" fìanta tzerriendi furriendisi' ke canis in cadena. "imoi nci funti prus sòrixis ke pipius!" su sìndigu no sciiat ita fai.

In su mentras ki si nci fiat pensendi, calincunu iat tocau s'enna. "potzu intrai?" iat nau una boxitedda pispisendi. Fiat un omineddu ki faiat arriri, cun d-unu bistiri asulu a arrayas, portat botinus acutzus e unu capeddu cun d-una pinna. "seu bènniu a lixerai su logu de is sòrixis -iat nau s'omineddu stramu- deu tengu unu sulitu màgigu e candu du umperu arrennesçu a mi fai sighiri de cosas, bestiàmini e òminis". "tui ses su sarbamentu miu! -iat tzerriau su sìndigu- ki arrennescis a nci bogai is sòrixis de bidda t'ap'a arregumpensai beni.

Su siliteri fiat bessiu de su comunu e fiat andau a pratza, cun su sulitu in manu. Sètziu acant''e una funtana de perda, iat inghitzau a sonai una cantzonedda spassiosa meda. Illuegus, de manera màgiga, tallus de sòrixis, ki dis praxiat cudda cantzonedda, fìanta bessius de is domus e ianta prenu sa pratza, ingiriendi a su suliteri.

Su suliteri iat inghitzau a caminai a sa lestra, truessendi sa bidda a passus mannus e andendi a su frùmini ki passat ingunis acanta, kena d'acabai de sonai su sulitu. Is sòrixis du sighianta e e nd'arribanta sempri de prus, e is de sa bidda du castisanta sprapedendi is ogus.

Candu fiat arribau a frùmini, si ndi fiat frimau in s'oru e iat lassau is sòrixis a si nç'acabaussai a frùmini. In d-unus cantu 'e minutus no ndi fiat abarrau mancu unu.

Sa tzitadi si ndi fiat scabùllia de is sòrixis: finsas is gatus no du podianta crei e iant inghitzau a festai sa bogada de is sòrixis ki finsas a cuddu mamentu fìanta stètius is meris de sa bidda. Su sìndigu fiat prexau meda, ma candu su suliteri fiat andau a nke issu po si pigai su cumpensu promìtiu, iat nau de manera axeda: "cumpensu? Ma ita totu ses narendi? La ki deu no t'apu promìtiu nudda!". E si ndi fiat postu a arriri a scracàllius. "comuncas, is sòrixis si ndi funti totus allupaus, e duncas no ant a torrai prus. Ti torru gràtzias e imoi piga su strexu e baidindi!".

"Ey' ey'! atura atentu" iat nau su suliteri, e si ndi fiat andau fendi unu arrisixeddu stramu. Iat truessau sa bidda cun su sulitu in manu de manera atrivia e si ndi fiat torrau a pratza, a nca si ndi fiat frimau sa primu borta. A pustis ki nc'iat pensau unu pagu, iat inghitzau a sonai un'atra mùsiga, allirga custa puru ma ki dissimbillat de sa primu mùsiga.

Tot'in d-unu totu is pipius de sa bidda fìanta bessius de domu amainaus de cudda mùsiga màgiga. Una truma allirga de pipius fiat sighendi s'omineddu stramu a botinus acutzus e a pinna in su capeddu, comenti fiat sutzèdiu cun is sòrixis.

Sbeliaus de sa mùsiga, is pipius iant passau padrus e padentis e a s'acabu de sa caminada fiant arribaus a monti. Insandus su suliteri iat mudau mùsiga, e totus iant intèndiu unu sçorrocu mannu meda, ki pariat unu terremutu, ìanta biu un'enna oberendisi' e is pipius ìanta sighiu a sa ghia insoru e s'enna si fiat torrada a serrai, fendi sparessi a totus.

Perou, unu pipiu ki fiat prus lentu de is atrus, fiat abarrau a goa e no fiat arrennesçu a intrai cun is atrus: iat tocau s'enna po de badas, e a s'acabu si ndi fiat torrau conc'a bidda tristu e scorau. Issu boliat atobiai torra is amighixeddus suus sceti.

Unu menjanu duncas, a scusi, iat torrau a fai su mori ki iat fatu sa di', iat fatu unu suliteddu cun d-unu arroghixeddu 'e linna e arribau ananti a s'enna de perda de su monti, iat inghitzau a sonai sa mùsiga allirga de su suliteri. De s'atra parti de su coronju unu sulitu - su de su suliteri màgigu - si nci fiat postu a arrespundi, e su monti iat inghitzau a si movi e s'enna manna si ndi fiat oberta a bellu a bellu e totu is pipius si ndi fìanta fuius prexaus a domu.

In cuddas diis, sa bidda fiat trista trista, kena sa boxi allirga de is pipius. Tot'in d-unu is de sa bidda iant intèndiu su carraxu de is pipius festendi e fiant andaus a atobiai a sa truma, prangendi de su prexu. Is babus e is mamas iant agatau torra is fillus insoru, sa bidda iat agatau torra su prexu e su sìndigu iat imparau a arrespetai su fueddu!

Imparaus de sa fàbula